Бешта муҳим ташаббусни амалга оширишишга бағишланган республика семинари ўтказилди

Жорий йилнинг 7-8 июнь кунлари Тошкент давлат иқтисодиёт университетида Ўзбекистон Республикаси Президенти томонидан илгари сурилган 5 та муҳим ташаббусни олий таълим муассасаларида амалга ошириш ҳамда маънавий-маърифий ва тарбиявий ишларни самарали ташкил этиш масалаларига бағишланган ўқув семинар бўлиб ўтади.

Ўқув семинарда вазирликлар, қўмиталар, нодавлат ва нотижорат ташкилотлар мутасаддилари, 40 нафардан ортиқ олий таълим муассасалари ректорлари, 150 нафардан ортиқ ёшлар билан ишлаш бўйича проректор ва бўлим бошлиқлари ҳамда ОАВ вакиллари иштирок этди.

Ўзбекистон Республикаси Президенти томонидан Сирдарё ва Наманган вилоятлари тажрибаси сифатида 2019 йил 19 март куни ёшлар маънавиятини юксалтириш ва уларнинг бўш вақтини мазмунли ташкил этиш бўйича 5 та ташаббус илгари сурилган эди. Мазкур ташаббусларни амалга ошириш мақсадида Бўка туманида тажриба-синов тариқасидаги Маданият ва маърифат экопарки фаолияти йўлга қўйилди. Таълим-тарбия самарадорлигини ошириш, ёшлар ўртасида китобхонлик тарғиботи бўйича маданий-маърифий ўтказилди.

Шунингдек, Президент Шавкат Мирзиёев томонидан 24 май куни Мирзо Улуғбек номидаги Ўзбекистон Миллий университетида олий таълим ва илмий-тадқиқот муассасалари раҳбарлари, академиклар, олимлар, ёш тадқиқотчилар билан учрашув давомида 5 та ташаббуснинг тарғиботи ва унда белгиланган дастурларни амалга ошириш борасида олий таълим муассасалари олдига янада аниқ вазифалар қўйилди.

Шундан келиб чиқиб, 5 та ташаббуснинг олий таълим тизимидаги ижросини ўрганиш бўйича комиссия тузилди ҳамда унинг зиммасига маънавий-маърифий ишлар, тарбия жараёнлари, талабалар бўш вақтини самарали ўтказиш, уларни жисмоний тарбия ва спорт, замонавий ахборот технологияларини ўзлаштириш каби масалалар ҳолатига баҳо бериш ҳамда мазкур масалада амалий ёрдамни ташкил этиш бўйича долзарб вазифалар юкланди.

Комиссия ташаббуси билан ташкил этилган мазкур ўқув семинарининг мақсади ушбу вазифаларнинг тўлиқ ижросини таъминлашга эришишдан иборат.

Ўқув семинари 2 кун давом этиб, унинг биринчи кунида Комиссия аъзолари томонидан 5 та ташаббусни амалга ошириш бўйича аниқ чора-тадбирлар қамраб олинган маърузалар ўқилди. Семинарнинг иккинчи кунида назарий таклифлар ва тавсияларни бевосита амалиётга жорий этиш бўйича амалий мулоқотлар ўтказилди. Гуруҳларга бўлинган ҳолда ташкил этилган мулоқотларда олий таълим муассасаларида мавжуд камчиликлар танқидий таҳлил қилинди, ҳолатни яхшилаш механизмлари юзасидан фикр-алмашилди. Мулоқотлар якунида 5 та ташаббусни олий таълим муассасаларида жорий этишга қаратилган устувор вазифаларга бағишланган якуний маъруза тингланди.

Мазкур ўқув семинарнинг Тошкент давлат иқтисодиёт университетида ўтказилиши бежиз эмас. Зеро, мазкур таълим муассасаси бешта ташаббусни олий таълим тизимига жорий этиш бўйича тажриба-синов майдони сифатида белгиланган бўлиб, университетда ҳар бир ташаббусни амалга ошириш бўйича махсус жиҳозланган 5 та лаборатория ташкил этилган. Мазкур лабораториялар ташаббусларни амалга оширишга қаратилган илғор тажрибаларни оммалаштириш, мавжуд камчиликларни чуқур таҳлил қилиш ва бартараф этиш, эришилаётган ютуқлар қамровини кенгайтиришга хизмат қиладиган майдончага айланади.

Ўқув семинари давомида 5 та ташаббуснинг ҳар бир йўналиши бўйича биттадан олий таълим муассасасини намунали қилиб тайёрлаш ва республикага ўрнак қилиб кўрсатишга келишиб олинди.

Семинар якунида 5 та ташаббуснинг олий таълим муассасаларидаги ижросини таҳлил қилиш, аниқланган камчиликларни бартараф этиш ва мавжуд аҳволни яхшилашга қаратилган чора-тадбирлар дастури тасдиқланди. Дастур ижросини республика миқёсида ўрганиб бориш, илғор тажрибаларни оммалаштириш мақсадида ўқув семинарининг ҳар чоракда бир маротаба ўтказилиши белгиланди.

 

Manba: Axborot xizmati

07.06.2019